Leita í fréttum mbl.is

Færsluflokkur: Skák

First Saturday #10-11

Þrátt fyrir að Húnninn hafi brugðist mér hef ég ákveðið að klára þessa pistlaröð. Þessi er svolítið seint á ferðinni en ég tel það skyldu mína að klára hann.

Tíunda umferðin var einstaklega gleðileg fyrir okkur strákana. Í fyrsta og eina skiptið í mótinu unnum við báðir í sömu umferð. Ég vann hálfgerðan skyldusigur gegn ungum írskum skákmanni sem var aðeins með 3 jafntefli í mótinu en Hjörvar hinsvegar kom mér og væntanlega öllum á óvart með því að vinna Weiming Goh (2375) sem þegar var kominn með áfanga í mótinu og hafði aðeins leyft tvö jafntefli en slátrað rest. Það sem er enn athyglisverðara er að Hjörvar var með svart!

Mestur undirbúningur hjá Hjörvari fór í mainline í Rauzernum. Alls 3 klukkutímar allavega! Minni tími fór í 3.Bb5 en við áttum síður von á þeim leik. Hjörvar hafði þó lítillega skoðað hann. Það verður svo að segjast að Hjörvar tefldi mjög solid og hrifsaði líklega smá frumkvæði í kringum 20. leik. í framhaldinu þvingaði hann svo Singapore strákinn til að fórna skiptamun og stýrði loks vinningnum í hús eins og herforingi.  Sannarlega glæsilega gert hjá stráknum!


Kaupþingsmenn hljóta að vera ánægðir með sinn mann sem hefur sýnt miklar framfarir!

Ég "hélt" að ég hefði unnið frekar öruggan sigur gegn Íranum þ.e. ég tefldi rólega, fékk slightly betra og vann án þess að leyfa mótspil. Eða svo hélt ég allavega þar til ég sló skákina inn í Fritz sem ég gerði ekki fyrr en á leiðinni heim. Þá kom eilítið í ljós sem hafði ekki einu sinni hvarflað að mér:

Ingvar_griffiths
Staðan eftir 27.dxe5 sem var svartur biskup.

Ég semsagt hafði leikið 26.d4 sem svartur svaraði með Hbg8 því að ef hann færir biskupinn hrynur staða hans eftir að ég drep á d6 með biskup. Í stöðumyndinni lék svartur svo 27...Hg1+ og ég vann auðveldlega eftir nokkra leiki í viðbót. Það sem við báðir misstum hinsvegar af var 27...Da4!! og ég get hreinlega gefist upp! Drottningin er friðhelg vegna máts á g1 og eftir aðra leiki kemur ...De4+ og þetta er hreinlega búið! Og ég sem hélt að þetta hefði verið nokkuð "hrein" skunkabönunarskák!?!

Hvað um það...við félagarnir vorum sáttir og fórum við gott út að borða glaðir í bragði. Reyndar var næsta skák kl. 10 morguninn eftir þar sem um var að ræða síðustu umferð og því gafst okkur lítill tími til stúderinga. Hjörvar átti hvítt á stigahæsta manninn í flokknum sínum en ég Englending með 2301. Reyndar hafði ég lítillega kynnst þessum Englending ásamt nokkrum öðrum keppendum eftir 9. umferð og þar höfðum við samið um að byrja okkar skák kl. 12 þar sem hvorugur okkar átti flug þennan dag og báðir erum við litlir morgunhanar.

Þegar ég kom um 12-leytið í síðustu umferðina var Hjörvar þegar að verja erfitt endatafl sem hann átti enga vinningsmöguleika í. Klassískt góður riddari gegn ömurlegum biskup endatafl. Hinsvegar var aðkoma svarta kóngsins erfið og á því héngu jafnteflismöguleikar Hjörvars. Skilst mér að hann hefði í raun átt að halda þessu en hefði mátt gefa sér öllu meiri tíma í að finna bestu vörnina og á endanum hafði reynsla Galyas þetta og Hjörvar varð að gefast upp. Skák mín varð svo nokkuð stutt. Ég ákvað að tefla modern...bæði til að rugla andstæðing minn og eins framtíðarandstæðinga. Ekkert jafn pirrandi og að undirbúa sig fyrir andstæðinga sem teflir 3-5 byrjanir gegn þínum opnunarleik. Tefldi semsagt frakka, skandinava, modern í þrem skákum með svart gegn 1.e4 og svei mér þá ef Sikileyjarvörn verður ekki næst á dagskrá! En eins og ég sagði varð skákin nokkuð stutt. Mér tókst að jafna taflið nokkuð þægilega og jafnteflisboð var nokkuð freystandi.

Lokaniðurstaðan var því hjá mér sú að ég tapaði 4 stigum og það eftir 2,5 í þrem síðustu umferðunum. Að mínu mati átti ég slæmt mót og var á köflum að tefla illa með lélega einbeitingu. Með tilliti til þess tel ég það gott að tapa aðeins 4 stigum á svo slæmu móti.  Hjörvar hinsvegar átti glæsilegt mót. Hann var með um 2,5 vinning meira en hann átti að fá og því hækkar hann um ein 37-39 stig fyrir þessa frammistöðu. Strákurinn á hraðri uppleið og ætti að komast yfir 2200 elóstigin á næsta lista.

Eftir síðustu umferðina héldu Hjörvar og Grétar faðir hans til Vínar þar sem þeir heimsóttu systur Grétars. Ég varð hinsvegar einn eftir og notaði tækifærið til að kynnast betur nokkum keppendum. Strax eftir umferðina settumst við niður og fengum okkur einn umgang. Með mér voru Luch frá Póllandi, Doggers frá Hollandi, Thomas frá Kanada og Eggleston frá Englandi. Í þessum umgangi var líka með okkur hress vinur Doggers frá Hollandi Gerald sem hafði heimsótt mótið í viku. Hann var hinsvegar á för heim eftir um klukkutíma. Við hinir ákváðum að hittast í kvöldmat á Red Pepper ágætis stað við eina af aðalgötunum. Þar bættist í hópinn GM Mark Bluvshtein sem var þar ásamt ungverskri kærustu sinni. Gullfalleg stelpa sem kom að horfa á allar umferðirnar (og trufla okkur hina!). Að sögn Marks var heimsókn hans hér og þátttaka eingöngu vegna hennar því vestrænir GM's fá ekki beint borgað fyrir að tefla í GM grúppu hjá Nagy. Talandi um Bluvshtein og Doggers þá verð ég að benda á myndband sem er væntanlegt á www.chessvibes.com þar sem Doggers lætur Bluvshtein sýna skák sína við L. Vadja þar sem Bluvshtein m.a. fórnaði 4 peðum og var nálægt því að mála meistaraverk en missti skákina niður í jafntefli. Frábær skák sem allir ættu að skoða.

Um kvöldið og eftir matinn lögðum við svo leið okkar á Margaret Island þar sem við skelltum okkur á skemmtistað og áttum gleðilega kvöldstund. Umgöngum var skipt bróðurlega á milli og mikið var skeggrætt og margar voru sögurnar. Misfyndnar þó en fyndnastar fannst mér þó ófyndnu sögurnar hjá Pólverjanum sökum þess að enska hans hljómar 99% eins og talandi Borat og því varð ég að berjast mjög um þegar það kom löng saga sem svo reyndist með eindæmum ófyndin. BoratAthyglisverðasta umræða kvöldsins var þó um skák L.Vajda frá Rúmeníu og Viktor Erdös frá Ungverjalandi. Sá síðarnefndi er efnilegur Ungverji með 2518 og með sigri með svörtu í síðustu umferð tryggði hann sér GM norm. Það sem mönnum þótti þó athyglisvert var eftirfarandi. Vajda var taplaus með frábært skor 8 eða 8,5 af 10. Vajda tapaði í rétt yfir 20 leikjum með hvítu og notaði varla tímann, 1:38 þegar ég kíkti í um 21-22. leik. Venjulegast þegar menn lenda í erfiðum fórnum og stöðum þar sem menn eru í vandræðum nota menn tímann til að finna leið út úr vandræðum. Punktur númer tvö var að þó að Erdös notaði tímann (var vel undir klukkutíma) vildu menn meina að hann hefði kláralega bara verið að "drepa tímann" þ.e. eins og hann væri bara að horfa út í loftið og láta sér leiðast. Á sama tíma virtist Vajda vera skítsama. Það ætti að vera augljóst hvað menn eru að gefa í skyn þarna og ef rétt reynist er það báðum þessum skákmönnum til háborinnar skammar. Við skulum þó vona að hér hafi einfaldlega verið á ferðinni sanngjörn skák.

Á fimmtudeginum hitti ég svo Hjörvar og Grétar aftur þegar þeir komu úr ferð sinni til Vínar. Við áttum pantað borð á Pomo D'Oro og þar áttum við síðustu kvöldmáltíðina. Þar fór eftirfarandi fram:

(þarf að kanna af hverju vídeóið verður svona dökkt á YouTube...í öllu falli er það sem er talað það sem skiptir máli)

Ég held að Hjörvar sé búinn að fyrirgefa mér en hann er víst alveg ólmur í rematch!

Um heimförina gæti ég svo skrifað gríðarlegan pirringspistil með mannfyrirlitninguna í broddi fylkingar...en orðum það bara þannig að ég var ekkert sérstaklega sáttur við að þurfa að tæma vasa, taka af mér beltið og taka laptopinn mínn úr töskunni þrisvar sinnum á um 3-4 klukkutímum. En látum þetta gott heita af pistlum frá First Saturday.

Mannfyrirlitningardjákninn á Burknavöllum.


First Saturday #6-7

Nennti ekki að blogga í gær, einhver bloggleti í gangi en reyni að hafa þennan pistil þeim mun lengri og djúsí Wink

Í sjöttu umferð vann ég semsagt hinn lýbíska Ali Salem. Lék hann 7.Re2 gegn Winawer og lék raunar strax af sér eftir að ég svaraði með best leiknum 7...Dc7. Stöðumyndirnar í síðustu bloggfærslu segja allt sem segja þarf um þessa skák. Auðveldur og þægilegur sigur.

AliSalem
Ali Salem átti ekki góðan dag gegn mér

Hjörvar átti frí í 6. umferð og því var ég einn Íslendinga að tafli á fimmtudeginum. Menn virðast nú eitthvað fylgjast með Hjörvari þarna enda hefur hann verið að tefla bara skínandi vel fyrir utan Werner skákina. Emad Imadi spurði mig t.a.m. "Where is little clever boy?" og gerði hring utan um augun með höndunum svona alþjóðlegt gleraugnatákn um leið og hann sagði þetta.  Í FM flokknum er líka jálkur frá Slóveníu held ég frekar en Serbíu sem er að fylgjast með Hjörvari og spjallaði eitthvað við Grétar um það. Tók hann víst 15 mínútur að ná einfaldi tjáningu en hann sagðist hafa lært ensku 1940-50 ca. en þætti betra að nota rússneskuna!

Talandi um Grétar þá gerðum við okkur glaðan dag á fimmutdaginn en þá átti Grétar 45 ára afmæli. Skemmtilegt að Hjörvar fengi frí þann dag og fóru þeir feðgar í skoðunarferð um Búdapest svona 2-hour bus tour auk þess að heimsækja stóra verslunarmistöð sem er hér í grenndinni.

Budapest
Þinghúsið séð yfir Búda-megin.

Nú við höfðum pantað borð af þessu tilefni á Pomo D'oro sem er vinsæll ítalskur veitingastaður hér í borg. Höfðum reynt að mæta þar einu sinni en þá var okkur tjáð að það þyrfti að panta borð. Veitingastaður þessi var hinn prýðilegasti. Í forrétt fengum við Grétar okkur sjávarréttasúpu og þar eins og í mörgu öðru er Grétar á heimavelli enda starfar hann í fiskvinnslubransanum, á með félaga sínum fyrirtækið Hafgæði.


Feðgarnir á Pomo D'oro...fengust ekki til að brosa....


...þangað til ég tók einn góðan MAGNÚÚÚS a-la Laddi á þetta.

Man ekki eftir að hafa fengið smekk áður á veitingastað en það þykir nauðsynlegt með sjávarréttasúpunni góðu. Svo var fenginn diskur til að henda öllum skeljunum í og fróðleikur dagsins var að henda óopnuðum skeljum á borðið. Ástæðan....þær eru dauðar þegar þær eru settar í pottinn og því opnast ekki skeljarnar wow-va-víva...very nice. Í aðalrétt fékk ég mér svo laxa-risotto en ég fæ mig ekki til að fá jafn einfalda rétti og spaghetti bolognese eða pizzur á svona fínum stað. Afmælisbarnið pantaði sér forláta nautasteik ásamt gæsalifur minnir mig.

Auk þess að vera vel að sér í sjávarréttafræðum er Grétar mikill áhugamaður um vín. Það lifnaði svoleiðis yfir honum hérna fyrsta daginn þegar hann sá búð með rauðvín/hvítvín við hliðina á hótelinu. Afmælisbarnið pantaði forláta flösku og tók menntað smakk á þetta fyrir okkur. Þjónninn rétti Grétari korkinn þegar hann hafði opnað flöskuna og þá tók okkar maður menntað sniff af tappanum og thumbs up. Fræddi hann mig um það að oft sé það þannig að jafnvel 10% framleiðslu vína eyðileggst vegna þessa að loft kemst í flöskuna og þá er vínið einfaldlega ónýtt. Í þeim tilvikum væri fúkkabragð af tappanum. Margir sem fá e.t.v. "vond" vín en þá var tilfellið bara að það hefur skemmst og kannski allt í lagi með vínið sjálft. Allavega....köllum þetta fróðleiksmola dagsins. Í öllu falli fínn matur og kvöldstund.

Pomo Doro

Þá að skákum sjöundu umferðar. Ég hafði hvítt gegn Laszló Eperjesi og einhvernveginn gat ekki ákveðið mig í undirbúningi hvort ég ætti að fara í Caro-Kann eða gegn Bogo/drottningarbragði og endaði á því að leika 1.f4. Hélt fyrst að ég væri að fá fínt út úr þessu en lék líklega ónákvæmt á krítísku augnabliki og endaði á að fá ekki neitt og samdi með aðeins verra en staða bauð reyndar ekki upp á mikið.

Eperjesi
Laszló Eperjesi jafnaði taflið nokkuð auðveldlega gegn mér.

Hjörvar fékk ungversku stelpuna Ruszin. Enn breytti andstæðingur Hjörvars útaf og undirbúningur fór fyrir lítið. Tefldar var enskur leikur 1.c4 e5. Hjörvar fékk einhvern slightara í miðtaflinu en mér fannst eins og e.t.v. hefði verið hægt að fá meira en það hefði þurft að tefla það mjög nákvæmt. Í eftirfarandi stöðu tók hann vitlausa strategíska ákvörðun að mínu mati:

hjorvar_ruszin

Hér drap Hjörvar ekki á d6. Vorum sammála um að það hefði verið betri leikur. Eftir uppskipti á hvítur mjög einfalt plan að pressa á drottningarvæng eftir c-línunni og Rg2-f4-d3-c5 gæti orðið óþægilegur. Hvíti biskupinn gerir í raun ekki mikið, hvítu peðin flest á svörtum reitum og enginn veikleiki sem biskupinn getur pressað á. Hjörvari tókst engu að síður að svíða stelpuna en líklegast hefði það orðið auðveldara eftir Bxd6.

Í dag er það svo Sandór Faragó hjá Hjörvari. Sá er með held ég 800 skákir í 1.e4 og 500 í 1.d4. Óþægilegt að undirbúa sig en Hjörvar er búinn að finna línu í Rauzer og er að renna yfir smá í Slabbanum líka. Hefur annars komið mér á óvart hvað Hjörvar er sjálfstæður og í raun menntaður miðað við aldur í undirbúning. Duglegur að nota Opening Report í Chessbase og finna góða menn sem eru að tefla varíantinn sem hann er að tefla. Erfitt er að skilgreina nákvæmlega hvert hlutverk manns er sem aðstoðarmaður/þjálfari en ég reyni að fylgjast með að undirbúningurinn sé allavega solid og svo er ég að reyna að temja honum sama og ég þ.e. að eiga stúderingarnar í sér Chessbase skrám til að geta skoðað síðar og eins að slá alltaf inn skákirnar sínar eftirá og hvar hefði mátt gera betur. Ég á orðið nú sjálfur 400 skáka base með eigin skákum og oft ómetanlegt að geta skoðað það. Er t.d. duglegur að setja undirbúningspælingar með í þá fæla.

Hjorvar3
Menntaður í stúderingunum strákurinn. Hér er verið að stúta KID með Saemisch.

Ég sjálfur fæ Ervin Tóth en hann er einn af þrem sem eiga möguleika á áfanga í flokknum og á ég þá alla eftir! Hjörvar reyndar svipað erfitt prógramm, á eftir Goh og Galyas. Líklegast er kóngsindverji á boðstólnum hjá mér en gæti transpóstað í Benoni ef hann teflir þetta eins og í 2. umferð.

Fyrir hverja umferð eru skákmenn beðnir um að slökkva á gsm símum því að hringing=tap. Þetta er tilkynnt hér úti líka og tekur einn skákmaðurinn í GM flokki enga sénsa. Hann setur símann upp á borð, slekkur á honum OG fjarlægir batteríið just in case! Þetta er FM Selim Citak frá Tyrklandi. Þarf vart að taka fram að svona solid skákmaður er með jafntefli í ÖLLUM umferðunum!

Áður en ég gleymi verð ég að benda á móður allra svíðinga en Dimo Werner tók einn slíkan á Nick Adams.

Werner_Adams
Nick Adams: "YES ég er að ná easy jafntefli"

Werner_Adams2
Dimo Werner: "NOT"

Þar til næst,

Ingvar Þór Jóhannesson


Lýbískt kebab - as promised

buda1

Fékk tvö peð í forrétt í 11 leikjum og hann var reyndar svolítið vel steiktur eins og sést á lokastöðunni:

buda2


First Saturday #5

Æi...hvað getur maður sagt? Þó ég fá NÚLL vinninga það sem eftir lifir móts og verð heimaskítsmát í öllum þá get ég samt borið höfuðið hærra en íslenska landsliðið í knattspyrnu....og hvað þá Ívar Ingimarsson sem verður laughing stock á blooper vídeói á YouTube. Vá hvað var fyndið....horfði á þetta í gær á Vísi í lýsingu Harðar Magnússonar. Hörður er bara legend...það er bara þannig!

En snúum okkur að skákinni! Hjörvar tapaði sinni fyrstu skák í gær og það gegn þýska alþjóðlega meistaranum Dimo Werner. Mesti undirbúningurinn fór í e3 í Slabbanum þ.e. í 4. leik. Kíktum á það og Hjörvar var vel ready í mainline varíanta á borð við Bd3 og ...dxc4. Dimo hinsvegar rútíneraður sem hann er fór í setup og lék Rbd2 í stað Rc3 og upp kom nokkuð klassísk staða. Hvítur með b3-c4-d4-e3 og Bb2 Be2 og hrókana á c- og d- og svartur með svipað b6-c5-d6-e6. Í þessari skák var ég hinsvegar ekki ánægður með tímanotkun Hjörvars sem datt í gamla farið að tefla þetta eins og atskák og missti hann af Bxh7 leik sem kláraði skákina. Reyndar aðeins flýtt sér líka í miðtaflinu því eftir uppskipti þurfti hann að leik bxc5 og verða eftir með stakt c-peð. Eftir 25 leiki og tapað var Hjörvar með 1:42 á klukkunni og var ég ekki ánægður með það. Vil sjá meira af því sem hann sýndi í hinum skákunum en í þeim flestum var hann að nota tímann mjög vel!

Í dag fær Hjörvar svo frí þar sem það stendur á stöku í flokknum hans. Gaurinn frá Singapore...Goh er svo gjörsamlega að stúta þessum flokk. Með fullt hús og sé ég ekki hver á að stoppa hann nema Dimo!

dimowerner

Dimo hefur verið duglegur að fínpússa byrjanirnar sínar á ICC!

Ég sjálfur telfdi langa skák við IM Bela Lengyel. Ég tefldi líka við hann 2005 og þá líka með hvítu. Kíkji skiljanlega á þá skák en hann kom mér á óvart með 2...dxc4 þ.e. mótteknu drottningarbragði og í raun aftur þegar hann tefldi svo "gamla" setupið ..Bg4-e6-Rc6-Bd6 þar sem svartur reynir að leika e5. Ég fékk eitthvað smá flashback í hvernig ætti að tefla gegn því en mundi það þó ekki jafnvel og ég hefði viljað. Notaði nokkuð mikinn tíma í byrjunina en fann ágætis leið held ég. Fékk svo þægilega betra, biskupaparið og nánast enga taphættu. Vantaði kannski meiri tíma til að finna besta planið og leyfði full snemma uppskipti á drottningum. Þá voru á borðinu mislingar en ég með aðeins betra þ.e. eiginlega enga veikleika sem hægt var að ráðast á. Reyndi ég í eitthvað um 60-70 leiki að hjakkast á honum í mislingum en staðan var steindauð og jafntefli varð niðurstaðan.  Hann var sjáanlega svekktur að ég væri eitthvað að reyna að hjakkast á steindauðu en hverju tapa ég á að tefla aðeins áfram stöðu sem ég get ekki tapað? Maður á í öllu falli ekki að hafa móral yfir slíku...hversu oft sjáum við erlenda skákmenn reyna þetta gegn "okkar mönnum"?

Í dag fæ ég svo andfúla hungover líbanska gaurinn. Sá náði sínu fyrsta priki í gær með jafntefli við hórumangarann Lasló Eperjesi ("Eperjesi is a pimp....MAN" - Nathan Resika FS Sept, 2002!).  Stefnt verður á sigur með svörtu því þessi gaur hefur vægast sagt ekki verið að heilla mig með taflmennsku sinni. Jafntefli væri í raun slys. Ef ég skít mig í fótinn með þessum yfirlýsingum er ég þó allavega ekki ívar Ingimarsson!

Í öllu falli verð ég að klára kjappann á 4 klukkutímum því að við eigum pantað borð kl. 20:30 á Pomo'Doro sem er helvíti flottur ítalsku restaurant sem mælt er með hér. Tilefni farar okkar þangað er afmæli Grétars pabba Hjörvars. Ég ætla að tippa á hann sé að verða svona 43 ára sem myndi þá þýða að hann hafi verið 33 ára þegar hann eignaðist Hjörvar.

Annars verð ég að segja að ég kann mjög vel við mig hérna í Búdapest. Veðrið er búið að vera mjög gott og fínn hiti (þó stöku mega-skúrir með þrumum og eldingum). Hótelið er svo á mjög góðum stað. Erum frekar central, rétt hjá aðalgöngugötunni, ánni og þinghúsinu. Við hliðina á hótelinu er svo VANGEFINN kirkja og maður fyllist lotningu þegar maður sér svona fallegar byggingar. Maður getur ekki annað en hugsað til þess hversu mikil vinna hefur farið í svona byggingar á þeim tíma þegar þær voru byggðar.

budapest_stephen_basilica

Einn fylgifiskur svona stórborga en í leiðinlegri kantinum þó er að verða vitni að mikilli fátækt. Við göngugötuna er alltaf á kvöldin kona að spila á fiðlu að betla og er með barnavagn með sér. Ég hef ekki haft mig í að labba nógu nálægt til að sjá hvort það sé krakki í vagninum. Samt finnst mér sumir misnota svona góðmennsku fólks. Ef þú átt fína fiðlu og kannt að spila á hana ertu varla svo illa staddur að þurfa að biðja aðra um ölmusu? Aftur á móti eru gömlu hjónin sem basically búa í smá innskoti fyrir búðarinngang ekki að feika neitt. Maður sér þau þarna á kvöldin og morgnana en þar sofa þau, eiga teppi og hafa undir sér pappakassa. Og eru kannski með nokkrar vatnflöskur og eitthvað sem þau hafa náð í. Ímynda mér að þau eyði deginum í almenningsgarði sem er í 100m fjarlægð hjá þessum stað og komi svo aftur eftir að búðin lokar. Skildi eftir hjá þeim íslenskar rúsínur sem að mér datt allt í einu í hug því það var það eina sem ég átti upp á herbergi, leið eitthvað svo illa að sjá þau þarna. En víst ekki mikið sem maður gert nema gert sér grein fyrir þeim forréttindum að búa í velferðarsamfélagi og því að hversdagslegt væl hjá manni er bara hræsni þegar maður hugsar hvernig sumt fólk þarf að lifa.

Eitt sem við Íslendinar erum kannski ekki nógu duglegir að gera er að mingla aðeins við erlenda skákmenn þegar við erum úti. Við eigum sjaldan frumkvæðið að slíku en hérna úti hef ég spjallað nú töluvert við þrjá keppendur og allt að þeirra frumkvæði í raun. Líbýumaðurinn Imad heilsar mér alltaf og spjallar og er hinn hressasti. Hollendingurinn í flokknum mínum (sem reyndar er að standa sig mjög vel) kom og heilsaði mér og bað fyrir kveðju frá Omari Salama sem hann hafði hitt á mótinu í Salou á Spáni.

Loks spjallaði ég aðeins við Pólverjann sem flengdi mig í 3. umferð. Við vorum að horfa saman að síðust skák dagsins sem var æsispennandi. Það var stelpan sem ég tefldi við í fyrstu umferð. Skrýtin skák...fékk skítastöðu úr byrjuninni...jafnvel tapað...tókst svo að jafna taflið og fá kolunnið. Klúðraði því svo í tímahraki í jafnteflislegt og þaðan yfir í tapað. Þá tók Englendingurinn við og missti það niður í jafntefli en re-raisti það svo með því að klúðra því í tap. Síðust 2-3 sveiflurnar fóru fram í miklu tímahraki í lokin. En hvað um það. Hann rölti með mér og spjallaði og hughreysti mig nú aðeins. Sagði að hefði komið sér á óvart hversu auðveldlega hann hefði unnið því ég hefði nú allavega litið út fyrir að vera nokkuð solid í basenum. Annars er fyndið hvað það segja nánast 75% útlendinga "Reykjavik?" ef maður segist vera frá Íslandi. Ég segi bara alltaf "já já"  því ekki nenni ég að fara að stafa Hafnaourfjordursenbörgkötz.

Jæja...ég er fallinn á tíma...þarf að skreppa og búa til líbanskt kebab!

mbk,

Ingvar Þór Jóhannesson


First Saturday #4

Jæja....þá er fyrsti vinningurinn kominn í hús. Hjörvar vann í gær ungverska gangavörðinn Zóltan Csapó 2164. Enn skutust menn undan undirbúning en Csapo svaraði 1.c4 með 1...c5 og Hjörvar tefldi setup í enska leiknum og var með þægilega stöðu eitthvað slightly betra. Í miðtafli sem var svo í jafnvægi tók Csapó sig til og lék af sér heilum manni og varð að gefast upp. Ágætis skák hjá Hjörvari aldrei í taphættu og hann átti alveg inni að það dytti inn einn sigur enda hefur hann verið að pressa menn stíft í undanförnum tveim umferðum.

Í dag fær Hjörvar svo hinn ofurrútíneraða þýska alþjóðlega meistara Dimo Werner sem hefur búið hér og teflt mjög lengi og með 500-600 skákir í base-num bara á hvítt! Mest hefur Hjörvar verið að kíkja á 4.e3 gegn Slabbanum og eins 3.Bb5 í Sikileyjarvörn. Á ég frekar von á 1.d4 og tilraun til að svíða barnið. Jafntefli væru fín úrslit en Dimo má passa sig!

FalkMiksa1

Ég sjálfur gerði stutt jafntefli (leikjalega séð - innskot Sigurbjörn) en var samt aðeins lengur en Hjörvar að tefla. Kom Hardicsay mér lítillega á óvart í Leningrad og eitthvað var minnið að svíkja mig en ég náði nú að tefla þetta rétt fyrir utan ...c6 sem veikti d6 reitinn. Ég var feginn þegar Hardicsay tók jafnteflisboði mínu því staðan var nokkuð þægileg á hann að mínu mati og líklegast að ég hefði orðið að þjást eitthvað í baráttu fyrir jafntefli ef hann hefði teflt þetta áfram.

Í dag fæ ég svo Bela Lengyel. Það er enn einn ofur-rútíneraður ungverskur IM sem hefur teflt hér lengi. Hann ætti nú ekki mikið að koma mér á óvart og gæti jafnvel farið svo að við endurtökum skák okkar fyrir 2 árum en ég luma á smá endurbót þar sem á að tryggja mér frekar þægilega stöðu sem ég ætti að geta pressað nokkuð áhættulaust. Hinsvegar eru þessir IMmar nú orðnir þokkalegir rebbar þannig að ég verð að passa mig.

Framhaldssagan um Líbýumennina gæti orðið eitthvað minna dramatískari en ég hélt en þeir mættu allir til leiks í gær. Nagy var ekki sjáanlega illur þannig að líklegast hefur deilan verið leyst á einhvern hátt.

Pirringur dagsins er svo erlent fólk sem heldur alltaf áfram að gjamma á sínu tungumáli þótt ljóst megi vera að það skiljist ekki. Hér hefur kætt okkur gríðarlega ein kelling á einni metrostöðinni sem hefur greinilega unnið þar síðan fyrir stríð. Við gerðum tilraun til að kaupa hjá henni vikukort í lestarstöðina. Það fór eitthvað á þessa leið:

Ingvar: seven days please
Irma Tóth: Kötzerem ötterem zjötsovetseg
Ingvar(heldur uppi sjö fingrum): SEVEN days please...sieben tagen? Ein woche? One week?
Irma Tóth: KÖTZEREM FÖKKEREM KEIN SKILJERVETZEG
Ingvar(fær lánaðan vikumiða sem Grétari tókst að kaupa og sýnir konunni): Same....this (bendir á miðann)...SEVEN MAN (heldur uppi sjö fingrum
Irma Tóth (hristir hausinn baðar út höndum): KÖTZERFUCKING MÖTZERUM NATSÖVETZEG
Ingvar og strákarnir....FOLD

smile2
Mynd: Irma Tóth

Sú er þrífur hér er svipuð....mun viðkunnalegri reyndar en hún hefur ekki ennþá áttað sig á að ég skil ekki "HAKKZÖVETSEG KOSSUTH TÉR BATTHANY UTCÁ" sem þýðir líklega "viltu skipta um handklæði".

Annars er skemmtilegt matchup nú í matnum hjá mér og spennandi verður að sjá hver nær forystu. Staðan er:

Pizza Marzano: 3
Chinese Buffet: 3

En ég kveð í bili enda styttist í umferð og maður verður að ná að næra sig.....meira síðar!

 


First Saturday #3

Eitthvað ætlar að ganga illa hjá okkur Hjörvar að landa fyrsta vinningnum í þessu móti. Hjörvar kominn með þrjú jafntefli og ég tvö og eitt tap. Ég tapaði illa í gær eins og ég kom inná í síðasta innskoti fyrir pólska pizzasendlinum Michail Luch. Tefldi ég eins og argasti flóðhestur og fór niður í logum í 19. leikjum með hvítu eins og einhver 1600 stiga maður (með fullri virðingu fyrir 1600 stiga mönnum Wink). Sannarlega einhver versta skák sem ég man eftir hjá mér hin síðari ár og best að gleyma henni bara sem fyrst (en þó ekki án þess að læra af eigin mistökum!).

Í dag fæ ég gamlan (P)ungverskan IM að nafni Peter Hardicsay. Sá ég hann í fyrsta skipti í gær því hann mætti ekki í fyrstu tvær umferðirnar. Ástæðan fyrir því er að hann var að tefla við hina ungversku IMmana í flokknum, Eperjesi og Lengyel, og virðist yfirleitt raunin vera þannig að þeir semja bara án þess að tefla.  Ekki fékk hann nú mikið meira að tefla í gær en líbanski skákmaðurinn í flokknum mínum mætti ekki til leiks í gær. Raunar varð það raunin með 2-3 líbanska skákmenn í viðbót en stór hópur af þeim er mættur hér til leiks. Hardicsay sat á borðinu við hliðina á mér og alltaf þegar maður gjó augunum yfir á borðið hans gaf hann international merki um að "hella í sig" og skellihló. Hress gaur og þurfti mikið að tjá sig, vildi meina að Líbýu mennirnir væru að nota tækifærið til að komast úr landi og drekka í laumi því ég veit ekki betur en þeir megi ekki drekka í heimalandi sínu.

Hjörvar tefldi eins ég sagði í gær við Bandaríkjamanninn Nick Adams. Ekki varð neitt úr undirbúningnum því Adams bryddaði upp á hinum eiturhvassa leik 1.d4 d5 2.e3!?!! og toppaði hinn heilaga hvassleika með 1.d4 d5 2.e3 Rf6 3.Rf3 c6 4.c4 e6 5.Rbd2!!  Svona hægt uppbyggingarsystem og svo sem ekkert við því að segja. Hvítur fékk auðvitað ekki neitt úr byrjuninni og staðan e.t.v. í jafnvægi þegar Hjörvar fann ...Bg5 sem veitti honum frumkvæði og á endanum komst Hjörvar í mjög vænlegt endatafl sem hlýtur með bestu taflmennsku að vera unnið.  Hjörvar hinsvegar sleppti honum úr snörunni að þessu sinni og þriðja jafnteflið varð staðreynd.

Í dag er það svo FM Zoltan Csapo með hvítu. Við gerum ráð fyrir kóngsindverskri vörn og þá er ætlunin að tefla Saemisch en Csapo þessi virðist geta teflt eitthvað frumlega svokölluð steypu system, t.d. 1.d4 b5 gegn Dimo Werner árið 2006. Ég spái að Hjörvar vinni í dag. Hlýtur að fara að detta inn hjá stráknum og hann á það líka alveg skilið.

Nagy1

Í dag verður svo gaman að fylgjast með sápuóperunni um Líbýumennina. Nagy var sannarlega ekki sáttur enda er Líbýumennirnir með einhvern mótþróa með að borga. Þeir eru víst 10-11 talsins og eiga bókað hótel í 30 daga. Skilst að það séu 13.000 EUR sem þeir eru ekki alveg tilbúnir að punga út. Nagy sagðist ætla í hart ef það gengi ekki og skilst mér að það sé police en ekki lambúshetta eins og Emory Tate vildi meina þegar hann var með sögur á Rvk International.

Ég kveð ykkur í dag með mynd af andstæðingi mínum í 2. umferð, Istvan Mayer.

smile1

mbk,

Ingvar Þór Jóhannesson


Skák er ömurleg *tómt*

Fyrirsögnin hér að ofan er gjarnan notuð af okkur skákmönnum þegar illa gengur á mótum og við þurfum að tjá okkur um það á skákhorninu.  Ótrúlegt hvað skák getur verið skrýtin. Fyrir rúmum mánuði síðan tefldi ég í tveim mótum heima á Íslandi sem gengu skínandi vel, fékk áfanga í öðru og hækkaði samtals um 42 elóstig sem er mjög mikið stökk að taka á einum lista. Þegar ég var að tefla þá var sjálfstraustið í bullandi hámarki og nánast allt gekk upp. Nú, rúmum mánuði síðar, er ég með 1 af 3 gegn frekar veikum andstæðingum og búinn að tefla nánast eins og algjör spassi og einbeitingin ömurleg. Nú rétt áðan tapaði ég með hvítu í 19 leikjum í einni ömurlegustu skák minni lengi. Hef þar að auki ekki tapað með hvítu nema einu sinni áður síðustu 20-30 skákir. Það sem verra er að andstæðingur minn í dag lék bara eðlilegum leikjum sem ég hefði leikið líka. Hvernig fer maður að þessu? Er þetta allt sálrænt?

Ingvar2

Jón Viktor félagi minn lenti í svipuðu. Í áðurnefndum mótum heima á fróni, Kaupþingsmótinu og svo Rvk International átti Jón svipaða svart/hvítt frammistöðu. Í fyrra mótinu skeit hann algjörlega á sig, svo illa að hann ætlaði hreinlega ekki að vera með í seinna mótinu. Hann var hinsvegar hálf þvingaður til þess og viti menn....Jón teflir eins og engill og tryggir sér sinn fyrsta stórmeistaraáfanga!

Hér gæti verið að við Jón þjáumst af svipaðri sálrænni klemmu. Ef við erum með of mikinn metnað og setjum of mikla pressu á sjálfa okkur gengur okkur e.t.v. frekar illa. Ég held að það hafi átti við fyrra mótið hjá Jóni og ég var með svipaðar væntingar áður en ég kom hingað út. Munurinn á hugarfarinu hjá mér núna og fyrir mótin heima var að heima ætlaði ég bara að hafa gaman að þessu og setti enga pressu á sjálfan mig. Jón að sama skapi tefldi greinilega seinna mótið algjörlega pressulaus því hann var búinn að skjóta niður eigin væntingar í fyrra mótinu.

Þannig að nú ætla ég bara að hætta að vera með of miklar pælingar og hreinlega hafa gaman af restinni af mótinu. Ég er búinn að skoða aðeins hvar ég lék af mér í byrjuninni í dag og ætla að kíkja aðeins á andstæðinginn fyrir morgundaginn. Höfum gaman að þessu!

Skák er skemmtileg,

 Ingvar Þór Jóhannesson


First Saturday #2

Jæja þá er spurning hvort maður þori að halda áfram að blogga hér frá Búdapest....erki-sjítaklerkurinn Muhammed Al-TorfStef er búinn að lýsa yfir jihad á mig fyrir mannfyrirlitningu á skákhorninu. Ég ætla samt að reyna að halda mínu striki LoL

Í gær var semsagt komið að annarri umferð hjá okkur félögunum hér í Búdapest. Áður en lengra er haldið er rétt að skella inn einni mynd af Hjörvari í Kaupþingsbolnum því ekki má gleyma þakklæti við styrktaraðila vorra!

Hjörvar1

Hjörvar fékk hinn reynda dr. Evarth Khan sem teflt hefur á First Saturday mótum í hálfan annan áratug. Hjörvar lék 1.c4 og undirbúningur okkar hafði að mestu snúist um Kóngsindverja eins og sagði í fyrri pistli. Evarth grunaði líklegast Hjörvar um græsku og sýndi þar ákveðinn rebbahátt að búast við erlendum pjakk vel undirbúnum. Khan valdi 1...e5 og snemma kom upp original staða úr enskum leik og held ég að Khan hafi leikið nýjung í 5-6. leik. Hjörvar tefldi skákina bara glymrandi vel og þegar ég sá stöðuna í miðtaflinu var Hjörvar kominn með biskupaparið og mjög þægilega stöðu sem var nánast ekki hægt að tapa. Á endanum var skipt upp og Hjörvar reyndi að vinna vænlegt endatafl en það tókst ekki. Vel tefld skák engu að síður þar sem hann var aldrei í taphættu og pressaði til vinnings gegn reyndum alþjóðlegum meistara. Aftur notaði hann tímann vel og virðist vera að þroskast að einhverju leyti með tímanotkun. Með smá meiri reynslu hefði þetta endatafl líklegast unnist.

Í dag mætir Hjörvar hinum bandaríska Nick Adams (2218) með svörtu. Hann teflir ávallt 1.d4 en teflir einstaklega leiðinlega þar sem hann steindrepur alltaf á d5 í Slabbanum og mætir t.a.m. Benko/Benoni 1.d4 Rf6 2.c4 c5 með 3.e3 sem er einstaklega steingeldur chicken leikur. Hjörvar vildi ekki tefla uppskiptaafbrigðið í Slabbanum þar sem hann vill vinna kauða (hann vill alltaf vinna!) og er planið að tefla 1.d4 d5 2.c4 e6 3.Rc3 c6 en þá drepur Adams á d5 í 4. leik og ætlar Hjörvar þá að taka með e-peði. Þetta er ekki góð leikjaröð á hvítt til að komast í hefðbundið drottningarbragð og gefur svörtum ýmsa möguleika svosem ...Bd6 og ...Re7 þ.e. uppskiptaafbrigði Caro-Kann með skiptum litum. Eftir sem áður slightly geldar stöður en allavega er peðastaðan ekki symmetrískt líkt og í uppskiptaafbrigði Slabbans.

Í gær tefldi ég við Fide meistarann Istvan Mayer. Sá hefur ekki teflt í 10 ár, allavega miðað við base-inn þá eru síðustu skákir hans 1997 en hann tefldi þó hér í maí 2007. Með fullri virðingu fyrir útliti hans grunar mig þó að hann hafi á þessum tíma tekið þátt í uppfærslu Búdapestarballetsins á Fílamanninum. Hann tefldi e4 og ég svaraði með Frakkanum. Fékk á mig advance variation eins og ég hafði búist við en ruglaði saman varíöntum. Ætlaði að prófa Rge7-g6 planið en var eitthvað fljótfær því það er aðeins gott gegn Be2 en hann hafði leikið Bd3. Hann refsaði mér nokkuð vel fyrir það með vel tímasettum h4 leik sem var gervi-peðsfórn. Ég lenti í þröngri og erfiðri stöðu og missti af eina tækifærinu til að drepa á h4 seinna í framhaldinu en þá sá ég ekki leið sem Fritz benti mér svo á eftir skákina en þá leið var mjög erfitt að koma auga á. Andstæðingi mínum verð ég nú að hrósa fyrir að tefla hreinlega bara mjög vel og ég var kominn í það mikla klemmu að ég varð að fórna skiptamun fyrir litlar bætur.  Sem betur fer var andstæðingur minn líka í tímapressu og loks byrjaði hann að klúðra aðeins og ég jafnaði taflið og fékk jafnvel betra og átti eina mjög vænlega leið sem ég missti af. Að lokum áttum við báðir innan við 2 mínútur eftir í stressandi stöðu þegar upp kom þráleikur sem við vorum báðir fegnir að var til staðar. Stressandi skák og var ég heppinn að sleppa með pulsu í henni.

Ingvar1

 Á eftir fæ ég IM Michail Luch frá Póllandi sem er held ég stigahæstur í flokknum með 2336. Reyndar er ég í töluvert veikari flokki heldur en Hjörvar og ef stigagróðinn minn úr Kaupþingsmótinu og Rvk International væri kominn inn væri ég stigahæstur með 2341. Hjá Hjörvari eru hinsvegar M.Galyas 2444 og D.Werner 2385. Báðir eru þeir mjög sterkir og rútíneraðir alþjóðlegir meistarar. Þar að auki er hinn efnilegi K.Goh frá Singapore sem í gær ruslaði upp Kaufman frá Bandaríkjunum í 16-17. leikjum með svörtu. Í öllu falli sannarlega meira scary flokkur hjá Hjörvari.  Líklegast er að tefldur verði drottningarindverji hjá mér en ég er ekki alveg harðákveðinn í hvort ég tefli það eða komi honum á óvart með 1.e4 og smá pet variation gegn Sikileyjarvörn (ekki 2.a3 og ekki 2.b3 btw).

Ég fór aðeins út að ganga áðan og veðrið er heldur betur að taka við sér. Nú er bara sól eins og maður sé á Mallorca og þurfti ég að stoppa tvisvar í göngutúrnum og fá mér ískaldan Evian. Alltaf virðist eitthvað vera um að vera hér og í gær mættum við endamörkum í maraþonhlaupi við þinghúsið.  Í göngutúrnum áðan sá ég svo risastóran bókamarkað sem búið er að setja upp hér á torgi við eina af aðalgöngugötunum.

Loks er hér mynd af Hjörvari að tafli við Asabri Hussein í fyrstu umferð. Hussein var eins og alþjóð veit sýknaður af ákærum um að hafa skipulagt hryðjuverkaárásirnar 11. september.....

Hjorvar2

.......NOT

með kveðju frá Búdapest,

Ingvar Þór Jóhannesson


First Saturday í Búdapest #1

Undirritaður og Hjörvar Steinn Grétarsson erum þessa stundina staddir í Búdapest þar sem við tökum þátt í First Saturday mótinu fræga. Báðir gerðum við jafntefli í gær í fyrstu umferð. Hjörvar fékk svart á skákmann frá Líbýu og tefldu þeir Cambridge Springs og fylgdu lengi vel skákinni E.Lasker-E.Lasker (Eduard og Emanuel ;-) ) þangað til Hjörvar breytti útaf með ...Rd3 í stað ...He8 (skákir verður hægt að nálgast á http://www.firstsaturday.hu/). Hjörvar tefldi skákina prýðilega og var kominn með slightly betra en urðu mislagðar hendur og þurfti þess í stað að berjast fyrir jafntefli sem hann gerði vel. Notaði tímann vel og margt jákvætt við skákina hjá honum.

Á eftir mætir Hjörvar Evarth Khan sem er IM sem hefur teflt á þessum mótum skuggalega lengi. Vel rútíneraður en ekkert skrímsli. Ég tefldi við hann fyrir 4 árum og var með fína stöðu en klúðraði og minnir mig að Sigurður Daði hafi líka teflt einu sinni við hann og tekið hann.  Í öllu falli hefur undirbúningur okkar að mestu farið í Kóngsindverska vörn sem Khan teflir mest og er það mitt mat að hann tefli það gegn 2156 pjakk sem hann HELDUR að hann sé að fara að vinna! Einnig höfum við kíkt lítillega á Slabbann og 1...c5 en Hjörvar mun nota 1.c4 leikjaröð. Khan teflir alltaf Rc6, a6, Hb8 gegn Saemisch afbrigðinu og fór undirbúningurinn að mestu í Hb1 gegn því sem að sjaldgæf leið en góð að mínu mati og verð ég bara að standa og falla með því.

Ég sjálfur fékk WGM (kvennstórmeistara) frá Hong Kong að nafni Anya Corke með 2154 stig!? Oft er ekki að marka titla frá svæðum á borð við Asíu, Afríku og S-Ameríku því að fólk fær oft IM og WGM titla með því að vinna ekkert svo sterk unglinga og/eða svæðamót. Í öllu falli var ég var um mig því hún var eitthvað að sniglast með hinum efnilega Kevin Goh frá Singapore sem er í IM flokki Hjörvars. Veit ég að hann er þjálfaður af Tibor Karolyi sem er þekktur ungverskur þjáflari og regular skrifari í NIC árbækurnar. Sá hann líka koma að fylgjast með okkar skák. Í öllu falli óþægilegur andstæðingur í fyrstu umferð, þ.e. up-and-coming Asíubúi með lág stig. Bjössi ætti að kannast við þá gryfju frá 2003 þegar hann vanmat Víetnama með 2157 ca. sem svo nánast ruslaði upp flokknum.

En að skákinni þá. Ég var var um mig fyrirfram en svo fannst mér hún tefla byrjunina illa og gefa mér mikið frumkvæði auk þess sem ég var strax kominn með mun betri tíma. Þá kom einhver skrýtinn kafli hjá mér. Ég var með +20 mín á klukkunni en næstu 4-5 leiki eyddi ég miklum tíma í að reyna að finna afgerandi leið til að hreinlega klára dæmið fyrir Chicago. Eitthvað var einbeitingin léleg hjá mér á þessum tíma því að í hvert skipti sem að ég var djúpt sokkinn í að reikna eitthvað færðist yfir mig óstjórnleg ólykt en það var frá Líbýu manninum á borðinu við hliðina á mér sem greinilega er að reyna við heimsmetið í andfýlu!! Mér er það stórlega til efs að önnur eins ólykt hafi komið upp úr lifandi manni á þessari jarðkringlu. Kvíði ég mikið að mæta þessum meistara síðar í mótinu! En niðurstaðan úr þessu varð að ég var allt í einu kominn í bullandi tímahrak átti aðins 16 mínútur eftir gegn 1:14 hjá þeirri asísku. Þar að auki hafði mér ekki tekist að nýta stöðuyfirburðina og var jafnvel kominn með slightly verra. Ég varð að lokum að sætta mig við jafntefli í 30. leik sem eru ákveðin vonbrigði með hvítu gegn svo stigalágum andstæðingi en þó engin katastrófa.

Rvk Open vs Mouradian 

Skákin mín var búin nokkuð á undan skák Hjörvars og lenti ég á spjalli við annan skákmann frá Líbýu sem bað mig að sýna sér skák dagsins og var hinn áhugasamasti að spjalla. Gerðum við það og renndum aðeins yfir skákina og ég að lokum kynnti mig og rétti fram spaðann. Í annað skiptið þennan dag (líka gegn stelpunni frá Hong Kong) fékk ég svona asíu/miðausturlanda höfnun þegar ég tók einhvern veginn í hálf kreppta greipina á þessum ágætu skákmönnum.  Án þess að vera vel að mér í austurlandafræðum þá er þetta líklegast af því að "þetta fólk" er vant því að þrífa á sér óæðri endann með þessari hönd og því hún almennt talin óhrein. Gætu e.t.v. fróðari menn frætt mig um þetta....Snorri?  Við þetta má bæta að myndin hér að ofan er úr Rvk Open 2006 þar sem ég tefldi gegn Knarik Mouradian frá LIB sem ég hélt að væri Líbýa en reyndist vera Líbanon þar sem ég sagði við ofangreindan Líbýu (LBA víst!) mann að ég hefði teflt við samlöndu hans en hann hafnaði því þar sem hann kannaðist við hana....hafði teflt við hana líka! Lítill heimur sannarlega og gaf hann mér forláta bulletin úr einhverskonar Arabic Cities móti þar sem var einmitt mynd af þessari Mouradian.

Í öllu falli fer vel um okkur hér í Búdapest. Veðrið hefur verið gott ekki of heitt en mjög gott og hótelið sem við erum á er nokkuð gott, nýuppgert og nýopnað. Loftkæling er til staðar sem er mui importante og svo lumuðu þeir meira að segja á sæmilegustu internettengingu! Svo er hálfgert stuð hérna í nágrenni við okkur. Í gönguleið okkar á skákstað er almenningsgarður þar sem er hálfgerð útihátíð í gangi...eitthvað festival sem átti að standa yfir 1-2. júní. Tónleikahald og tjöld með bjór og allskonar veitingum.

Frá Búdapest,

Ingvar Þór Jóhannesson


Staða dagsins 29.01.2007

Xzibit(2381)-Peachy(2390) ICC 5-minute

 

Þessi staða kom upp hjá mér í 5 mínútna hraðskák á netinu. Fann hér skemmtilegt gegnumbrot sem algjörlega leggur svörtu stöðuna í rúst. Hvítur leikur og vinnur!


Næsta síða »

Höfundur

Ingvar Þór Jóhannesson
Ingvar Þór Jóhannesson
Tölvunarfræðingur FIDE meistari í skák og áhugamaður um íþróttir.
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband